ശ്രീനഗർ: മന്ത്രിസഭാ പുനഃസംഘടനയ്ക്ക് പിന്നാലെ ജമ്മു കശ്മീരിലെ നാഷണൽ കോൺഫറൻസ് സർക്കാരിൽ വൻ രാഷ്ട്രീയ പ്രതിസന്ധിയും ആഭ്യന്തര കലാപവും. മുഖ്യമന്ത്രി ഒമർ അബ്ദുള്ളയ്ക്ക് കടുത്ത വെല്ലുവിളി ഉയർത്തിക്കൊണ്ട് ഭരണകക്ഷിയിലെ 25 എംഎൽഎമാർ രംഗത്തെത്തുകയും എട്ട് മന്ത്രിമാരെയും മുഖ്യമന്ത്രിയുടെ മുതിർന്ന ഉപദേശകനെയും മാറ്റണമെന്ന് ആവശ്യപ്പെട്ട് അന്ത്യശാസനം നൽകുകയും ചെയ്തു.
രണ്ടാഴ്ചയ്ക്കുള്ളിൽ ആവശ്യങ്ങളിൽ അനുകൂല തീരുമാനമെടുത്തില്ലെങ്കിൽ വൻ തുടർനടപടികളിലേക്ക് കടക്കുമെന്നാണ് വിമതരുടെ ഉന്നത മുന്നറിയിപ്പ്.പാർട്ടിയുടെ ആകെ 41 എംഎൽഎമാരിൽ ഭൂരിഭാഗം വരുന്ന 25 അംഗങ്ങൾ കശ്മീരിലെ മുതിർന്ന എംഎൽഎ കൈസർ ജംഷീദ് ലോണിന്റെ വസതിയിൽ രഹസ്യമായി യോഗം ചേർന്നാണ് നിർണ്ണായക തീരുമാനമെടുത്തത്.
മുഖ്യമന്ത്രിയുടെ ഉപദേഷ്ടാവ് നാസിർ അസ്ലം വാനി, ഡെപ്യൂട്ടി മുഖ്യമന്ത്രി സുരീന്ദർ ചൗധരി ഉൾപ്പെടെയുള്ള മന്ത്രിമാരെ മാറ്റണമെന്നും പ്രമേയത്തിൽ ആവശ്യപ്പെടുന്നു. ഭരണപരമായ തീരുമാനങ്ങളിൽ കൂടുതൽ സുതാര്യത ഉറപ്പുവരുത്തണമെന്നും, പാർട്ടിയും സർക്കാരും ഏതാനും ചിലരുടെ മാത്രം കുടുംബസ്വത്തായി മാറ്റരുതെന്നും യോഗത്തിൽ ഉയർന്നുവന്ന പ്രധാന ആരോപണമാണ്.
പാർട്ടിയിലെ വൻ കലാപം രൂക്ഷമാകുന്നതോടെ ഒമർ അബ്ദുള്ള സർക്കാർ ഉടൻ നിലംപൊത്തുമെന്ന അവകാശവാദവുമായി പ്രതിപക്ഷമായ ബി.ജെ.പി രംഗത്തെത്തിയിട്ടുണ്ട്. മുഖ്യമന്ത്രി ഒമർ അബ്ദുള്ള ദൽഹിയിൽ ഒരു സ്വകാര്യ ചടങ്ങിൽ പങ്കെടുക്കാൻ എത്തി നിൽക്കുമ്പോഴാണ് ഈ വിമത നീക്കം സജീവമായത് എന്നത് ശ്രദ്ധേയമാണ്.
മന്ത്രിസഭാ മാറ്റത്തിൽ പരസ്യ പ്രതിഷേധം രേഖപ്പെടുത്തിയ മുതിർന്ന പാർട്ടി എംപിയും ആൾ ഇന്ത്യാ ഷിയ പേഴ്സണൽ ബോർഡ് ഭാരവാഹിയുമായ ആഗാ റുഹുല്ലാ മെഹ്ദി, നവംബർ മൂന്നിന് താൻ പാർട്ടിയുടെ പ്രാഥമിക അംഗത്വത്തിൽ നിന്നും ലോകസഭാ അംഗത്വത്തിൽ നിന്നും രാജിവെയ്ക്കുമെന്ന് പ്രഖ്യാപിച്ചതും നാഷണൽ കോൺഫറൻസിനെ ഞെട്ടിച്ചിട്ടുണ്ട്.
90 അംഗ നിയമസഭയിൽ നാഷണൽ കോൺഫറൻസ് സർക്കാരിനെ പ്രതിസന്ധിയിലാക്കുന്ന ഈ നീക്കം തടയാൻ പാർട്ടി സുപ്രീം നേതാവ് ഫാറൂഖ് അബ്ദുള്ളയും ഒമറും തിടുക്കത്തിലുള്ള ചർച്ചകൾ ആരംഭിച്ചിട്ടുണ്ട്.
