ആയിരക്കണക്കിന് കിലോമീറ്ററുകൾ പിന്നിട്ട്, കടലുകൾക്കും ഭൂഖണ്ഡങ്ങൾക്കും മുകളിലൂടെ വിസ്മയകരമായ ദേശാടനയാത്ര. ലോകത്തെ അതിശയിപ്പിക്കുന്ന പക്ഷികളുടെ ഈ യാത്രയിൽ വീണ്ടും ശ്രദ്ധേയരായിരിക്കുകയാണ് അമൂർ പരുന്തുകളായ അപാപാങ്ങും അലങ്ങും.
ഉപഗ്രഹ ട്രാക്കിങ് സംവിധാനത്തിലൂടെ ശാസ്ത്രലോകം നിരീക്ഷിക്കുന്ന ഈ രണ്ട് പക്ഷികൾ 23 രാജ്യങ്ങളിലൂടെ സഞ്ചരിച്ച് മണിപ്പൂരിൽ തിരിച്ചെത്തി. ഏകദേശം 6,000 കിലോമീറ്റർ കടൽ ദൂരം ഉൾപ്പെടുന്ന യാത്ര പൂർത്തിയാക്കിയാണ് ഇവയുടെ മടക്കം. കേന്ദ്ര പരിസ്ഥിതി മന്ത്രി ഭൂപേന്ദർ യാദവാണ് ഇക്കാര്യം അറിയിച്ചത്.
വടക്കുകിഴക്കൻ ചൈനയിലെ പ്രജനന കേന്ദ്രങ്ങളിൽനിന്ന് പുറപ്പെട്ട് വെറും 11 ദിവസംകൊണ്ടാണ് അപാപാങ്ങും അലങ്ങും മണിപ്പൂരിലെത്തിയത്. കഴിഞ്ഞ വർഷം നവംബറിൽ വൈൽഡ്‌ലൈഫ് ഇൻസ്റ്റിറ്റ്യൂട്ട് ഓഫ് ഇന്ത്യയിലെ (ഡബ്ല്യുഐഐ) ശാസ്ത്രജ്ഞരാണ് ഇവയുടെ സഞ്ചാരം നിരീക്ഷിക്കുന്നതിനായി സാറ്റലൈറ്റ് ടാഗുകൾ ഘടിപ്പിച്ചത്. ദേശാടന പക്ഷികളുടെ യാത്രാപഥം, സഞ്ചാര വേഗം, അതിജീവന തന്ത്രങ്ങൾ എന്നിവയെക്കുറിച്ച് കൂടുതൽ വിവരങ്ങൾ ശേഖരിക്കാൻ ഈ നിരീക്ഷണം സഹായിക്കുന്നുണ്ട്.
അതിർത്തികൾക്കും ഭൂഖണ്ഡങ്ങൾക്കും അപ്പുറത്തേക്ക് സഞ്ചരിക്കുന്ന അമൂർ പരുന്തുകളെ ‘ലോക പൗരന്മാർ’ എന്നാണ് ഭൂപേന്ദർ യാദവ് വിശേഷിപ്പിച്ചത്. *മണിപ്പൂരിൽ വിശ്രമം; അടുത്ത ലക്ഷ്യം സോമാലിയ* മണിപ്പൂരിലെ തമെങ്ലോങ് ജില്ലയിലെ പർവതപ്രദേശങ്ങളിൽ അടുത്ത രണ്ടോ മൂന്നോ ആഴ്ചകൾ അപാപാങ്ങും അലങ്ങും ചെലവഴിക്കും. ദീർഘദൂര യാത്രയ്ക്കിടയിൽ വിശ്രമിക്കാനും അടുത്ത ഘട്ടത്തിലേക്കുള്ള ഊർജം സംഭരിക്കാനും ഈ പ്രദേശം അമൂർ പരുന്തുകൾക്ക് നിർണായകമാണ്.
തമെങ്ലോങ്ങിലെ വിവിധ ഭാഗങ്ങളിൽ സുലഭമായി ലഭിക്കുന്ന ചിതലുകളാണ് ഈ സമയത്ത് ഇവയുടെ പ്രധാന ഭക്ഷണം. കൊഴുപ്പ് സംഭരിക്കാൻ സഹായിക്കുന്ന ഈ ആഹാരം തുടർന്നുള്ള ദീർഘദൂര പറക്കലിന് ആവശ്യമായ ഊർജം നൽകുന്നു. യാത്രയ്ക്കിടയിലെ പ്രധാന ഇടത്താവളമായി മണിപ്പൂർ മാറിയതോടെ, ഓരോ വർഷവും ഈ ദേശാടന പക്ഷികളുടെ വരവിനായി പ്രദേശവാസികളും കാത്തിരിക്കാറുണ്ട്.
മണിപ്പൂരിൽനിന്ന് അടുത്തതായി ഇവ പറന്നെത്തുക ആഫ്രിക്കയിലെ സോമാലിയയിലേക്കാണ്. ഏകദേശം 6,000 കിലോമീറ്റർ ദൂരം ആറു ദിവസത്തോളം തുടർച്ചയായി സഞ്ചരിച്ചായിരിക്കും ഈ ഘട്ടം പൂർത്തിയാക്കുക. ഇതിൽ ഏകദേശം 3,000 കിലോമീറ്റർ അറേബ്യൻ കടലിന് മുകളിലൂടെയുള്ള യാത്രയാണ്. വിശാലമായ കടൽപ്രദേശങ്ങൾക്കു മുകളിലൂടെ ദിവസങ്ങളോളം പറക്കാനുള്ള ഇവയുടെ കഴിവ് പക്ഷിലോകത്തിലെ ശ്രദ്ധേയമായ അതിജീവന സവിശേഷതകളിലൊന്നാണ്.
അപാപാങ്ങിന്റെയും അലങ്ങിന്റെയും സഞ്ചാരം ഉപഗ്രഹം വഴി നിരീക്ഷിക്കുന്നതിലൂടെ ദേശാടനത്തിന്റെ ദൂരവും സമയവും യാത്രാപാതയും സംബന്ധിച്ച നിർണായക വിവരങ്ങൾ ശാസ്ത്രജ്ഞർക്ക് ലഭിക്കുന്നു. രാജ്യങ്ങൾക്കും സമുദ്രങ്ങൾക്കും മുകളിലൂടെ നടത്തുന്ന ഈ സാഹസിക യാത്രയെക്കുറിച്ചുള്ള പഠനങ്ങൾ അമൂർ പരുന്തുകളുടെ ജീവിതരീതിയും പരിസ്ഥിതിയിലെ അവയുടെ പ്രാധാന്യവും കൂടുതൽ വ്യക്തമായി മനസ്സിലാക്കാൻ സഹായിക്കും.
