പൂനെ : പ്രമുഖ പരിസ്ഥിതി ശാസ്ത്രജ്ഞന് മാധവ് ഗാഡ്ഗില് അന്തരിച്ചു. പൂനെയിലെ വീട്ടില് വച്ചായിരുന്നു അന്ത്യം. പശ്ചിമഘട്ട സംരക്ഷണത്തിനായി പോരാടിയ ഗാഡ്ഗിലിനെ രാജ്യം പത്മഭൂഷണ് നല്കി ആദരിച്ചിരുന്നു. സംസ്കാരം ഇന്ന് വൈകീട്ട്.
1942 മെയ് 24ന് പൂനെയില് ജനിച്ചു. അമ്മ പ്രമീള. അച്ഛന് സാമ്പത്തികശാസ്ത്ര വിദഗ്ദ്ധനായ ധനഞ്ജയ് രാംചന്ദ്ര ഗാഡ്ഗില്. നാസ്തികനായ ധനഞ്ജയ് ജാതിയുടെ അടയാളമാണെന്ന കാരണത്താല് അദ്ദേഹത്തിന്റെ കുട്ടികളുടെ പൂണൂല് ചടങ്ങ് നടത്തിയില്ല. പൂനെ യൂണിവേഴ്സിറ്റിയില് നിന്നും മുംബൈയില് നിന്നും ജീവശാസ്ത്രം പഠിച്ചശേഷം മാധവ് ഗണിതപരിസ്ഥിതി ശാസ്ത്രത്തില് ഹാര്വാഡ് യൂണിവേഴ്സിറ്റിയില് ഡോക്ടറേറ്റ് ചെയ്തു. ഹാര്വാഡില് അദ്ദേഹം ഒരു ഐ ബി എം ഫെലോ ആയിരുന്നതു കൂടാതെ അപ്ലൈഡ് മാതമാറ്റിക്സില് റിസേര്ച്ച് ഫെലോയും ജീവശാസ്ത്ര അദ്ധ്യാപകനുമായിരുന്നു.
1973 മുതല് 2004 വരെ ബംഗളൂരുവിലെ ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സില് അദ്ധ്യാപകനായിരിക്കുമ്പോള് അദ്ദേഹം അവിടെ പാരിസ്ഥിതിക ശാസ്ത്രത്തില് ഒരു വിഭാഗം ആരംഭിച്ചു. ഗാഡ്ഗില് സ്റ്റാന്ഫോഡിലും ബെര്ക്ലിയിലെ കാലിഫോണിയ സര്വകലാശാലയിലും സന്ദര്ശക പ്രൊഫസര് ആയിരുന്നിട്ടുണ്ട്.
