സിഡ്നി: ഓസ്ട്രേലിയക്കെതിരായ ആഷസ് പരമ്പരയിലെ അവസാന ടെസ്റ്റില് ഇംഗ്ലണ്ട് ഒന്നാം ദിനം കളി നിര്ത്തുമ്പോള് ഭേദപ്പെട്ട നിലയില്. മഴയെ തുടര്ന്നു ആദ്യ ദിനത്തില് 45 ഓവറാണ് എറിയാന് സാധിച്ചത്. ഇംഗ്ലണ്ട് സ്റ്റംപെടുക്കുമ്പോള് 3 വിക്കറ്റ് നഷ്ടത്തില് 211 റണ്സെന്ന നിലയില്.
ജോ റൂട്ടും ഹാരി ബ്രൂക്കും നേടിയ അര്ധ സെഞ്ച്വറികളുടെ ബലത്തിലാണ് ആദ്യ ദിനത്തില് ഇംഗ്ലണ്ട് പൊരുതിയത്. 57 റണ്സിനിടെ 3 വിക്കറ്റുകള് നഷ്ടമായ ശേഷമാണ് ഇംഗ്ലണ്ട് തിരിച്ചു വന്നത്. കളി നിര്ത്തുമ്പോള് റൂട്ടും ബ്രൂക്കും ക്രീസില് തുടരുന്നു.
റൂട്ട് 8 ഫോറുകള് സഹിതം 72 റണ്സുമായി പുറത്താകാതെ നിന്നു. ബ്രൂക്ക് 6 ഫോറും ഒരു സിക്സും സഹിതം 78 റണ്സുമായും ക്രീസില്. ഓപ്പണര് സാക് ക്രൗളി (16), ബെന് ഡക്കറ്റ് (27), ജേക്കബ് ബേതേല് (10) എന്നിവരാണ് പുറത്തായ താരങ്ങള്.
ഓസീസിനായി മിച്ചല് സ്റ്റാര്ക്ക്, മിച്ചല് നെസര്, സ്കോട്ട് ബോളണ്ട് എന്നിവര് ഓരോ വിക്കറ്റെടുത്തു. കരിയറിലെ അവസാന ടെസ്റ്റാണ് ഓസീസ് താരം ഉസ്മാന് ഖവാജ കളിക്കുന്നത്.
