കോട്ടയം : സിഐടിയു കോട്ടയം ജില്ലാ സെക്രട്ടറിയായി അഡ്വക്കേറ്റ് കെ അനിൽ കുമാറിനെ തെരഞ്ഞെടുത്തു. ജില്ലാ സെക്രട്ടറിയായിരുന്ന റ്റി ആർ രഘുനാഥൻ സി പി എം ജില്ലാ സെക്രട്ടറിയായി തെരഞ്ഞെടുക്കപ്പെട്ട ഒഴിവിലാണ് തിരഞ്ഞെടുപ്പ്.
നിലവിൽ സിപിഎം സംസ്ഥാന കമ്മിറ്റി അംഗമാണ്. ഐപ്സോ അഖിലേന്ത്യ വൈസ്പ്രസിഡൻ്റായും അഖിലേന്ത്യ ലോയേഴ്‌സ് യൂണിയൻ സംസ്ഥാന വൈസ്പ്രസിഡൻറായും പ്രവർത്തിക്കുന്നു. മീനച്ചിലാർ-മീനന്തറയാർ-കൊടൂരാർ പുനഃസംയോജന പദ്ധതി നടപ്പിലാക്കുന്ന ജനകീയ കൂട്ടായ്‌മയുടെ കോ-ഓർഡിനേറ്ററാണ്.
കോട്ടയം ജില്ലയിലെ തിരുവാർപ്പിൽ ആർ കെ മേനോന്റെയും സുന്ദരവല്ലിയമ്മയുടെ യും മകനാണ്. കോട്ടയം സിഎംഎസ് കോളേജിൽനിന്ന് ബിരുദവും തിരുവനന്തപുരം ലോ അക്കാദമി ലോ കോളേജിൽനിന്ന് നിയമബിരുദവും നേടി. 1987 മുതൽ കോട്ടയം ജില്ലാ കോടതിയിൽ അഭിഭാഷകനാണ്.
കോട്ടയം ജില്ലാ പഞ്ചായത്ത് ആരോഗ്യ- വിദ്യാഭ്യാസ സ്റ്റാൻഡിങ് കമ്മിറ്റി ചെയർമാനായും കോട്ടയം സഹകരണ അർബൻ ബാങ്ക് ചെയർമാനായും പ്രവർത്തിച്ചു.
ഭാര്യ: ശ്രീദേവി. മക്കൾ: കൃഷ്‌ണാ അനിൽകുമാർ, കൃപാ അനിൽകുമാർ.
മരുമകൻ: ഡോ.സിദ്ധാർഥ് രാമചന്ദ്രൻ.
അഡ്വ.കെ അനിൽ കുമാർ സി ഐ റ്റി യു കോട്ടയം ജില്ലാ സെക്രട്ടറി
