ലണ്ടൻ: പശ്ചിമേഷ്യയിൽ സംഘർഷം വീണ്ടും രൂക്ഷമായതോടെ ആഗോള വിപണിയിൽ ക്രൂഡ് ഓയിൽ വില കുതിച്ചുയർന്നു. ബ്രെന്റ് ക്രൂഡ് ഓയിൽ വില ബാരലിന് 116.20 ഡോളറിലെത്തി. 2022 ജൂണിന് ശേഷമുള്ള ഏറ്റവും ഉയർന്ന നിരക്കാണിത്.
ലോകത്തെ പ്രധാന എണ്ണ ഉൽപ്പാദന മേഖലകളിൽ നിന്നുള്ള വിതരണത്തെ സംഘർഷം ബാധിച്ചേക്കുമെന്ന ആശങ്കയാണ് വിലവർധനയ്ക്ക് പ്രധാന കാരണം.
സൗദി അറേബ്യയ്ക്ക് നേരെ ഹൂത്തികൾ നടത്തിയ ആക്രമണങ്ങൾ എണ്ണവിതരണത്തെക്കുറിച്ചുള്ള ആശങ്ക വർധിപ്പിച്ചിട്ടുണ്ട്. വെള്ളിയാഴ്ച അമേരിക്കൻ ബെഞ്ച്മാർക്കായ വെസ്റ്റ് ടെക്സസ് ഇന്റർമീഡിയറ്റ് ക്രൂഡ് ഓയിൽ വിലയും 1.7 ശതമാനം ഉയർന്ന് ബാരലിന് 101.12 ഡോളറിലെത്തി. ഇതോടെ തുടർച്ചയായ മൂന്നാം ആഴ്ചയും ബ്രെന്റ് ക്രൂഡ് വില വർധിച്ചു.
സൗദി അറേബ്യയും യമനിലെ ഹൂത്തികളും തമ്മിലുള്ള ഏറ്റുമുട്ടൽ ശക്തമായതിനെ തുടർന്ന് ധാഹ്റാനിലെ ആസ്ഥാനത്തുനിന്ന് ജീവനക്കാരെ ഒഴിപ്പിക്കാൻ സൗദി അരാംകോ വ്യാഴാഴ്ച നിർദേശം നൽകിയിരുന്നു. മേഖലയിലെ സുരക്ഷാ സാഹചര്യം എണ്ണ ഉൽപ്പാദനത്തെയും വിതരണത്തെയും ബാധിക്കുമെന്ന ആശങ്കയ്ക്കിടെയാണ് ഈ നീക്കം.
ചെങ്കടലിനെയും ഏഡൻ ഉൾക്കടലിനെയും ബന്ധിപ്പിക്കുന്ന ബാബ് എൽ-മന്ദബ് കടലിടുക്കിലെ ഗതാഗത തടസ്സമാണ് എണ്ണവിപണി ഉറ്റുനോക്കുന്ന മറ്റൊരു പ്രധാന വിഷയം. ആഗോള ചരക്കുനീക്കത്തിന് നിർണായകമായ ഈ പാതയിലെ തടസ്സങ്ങൾ എണ്ണയുടെ വിതരണം വൈകിപ്പിക്കാനും ഗതാഗതച്ചെലവ് ഉയർത്താനും ഇടയാക്കും.
സംഘർഷം കൂടുതൽ രൂക്ഷമായാൽ ആഗോള എണ്ണവിതരണ ശൃംഖലയെ പ്രതികൂലമായി ബാധിക്കുമെന്നും അതിന്റെ പ്രതിഫലനം വിലയിൽ വീണ്ടും പ്രകടമാകുമെന്നും യു.ബി.എസ് അനലിസ്റ്റ് ജിയോവന്നി സ്റ്റൗനോവോ മുന്നറിയിപ്പ് നൽകി. പശ്ചിമേഷ്യയിലെ സംഭവവികാസങ്ങൾ വരും ദിവസങ്ങളിലും എണ്ണവിലയുടെ ഗതിയെ നിർണയിക്കുമെന്നാണ് വിപണിയുടെ വിലയിരുത്തൽ.
