കൊൽക്കത്ത:: ദുർഗാ പൂജ പന്തലിലുണ്ടായ ദാരുണമായ തിക്കിലും തിരക്കിലും പെട്ട് 17 പേർ മരിച്ച സംഭവത്തിൽ പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തര മന്ത്രി അമിത് ഷായും അനുശോചനം രേഖപ്പെടുത്തി.
ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് പ്രധാനമന്ത്രിയുടെ ദുരിതാശ്വാസ നിധിയിൽ നിന്ന് രണ്ട് ലക്ഷം രൂപ വീതവും പരിക്കേറ്റവർക്ക് 50,000 രൂപ വീതവും ധനസഹായം പ്രഖ്യാപിച്ചു.
വടക്കൻ കൊൽക്കത്തയിലെ ചോർ ഭാഗാനിലുള്ള പൂജ പന്തലിൽ ശനിയാഴ്ച വൈകുന്നേരത്തോടെയാണ് അപകടമുണ്ടായത്. കനത്ത മഴയും മിന്നലും അനുഭവപ്പെട്ടതിനെ തുടർന്ന് പുറത്തുണ്ടായിരുന്ന ആളുകൾ ഒന്നിച്ച് പന്തലിലേക്ക് കയറാൻ ശ്രമിച്ചതാണ് വലിയ ദുരന്തത്തിൽ കലാശിച്ചത്.
സംഭവത്തിന് പിന്നാലെ ആഭ്യന്തര മന്ത്രി അമിത് ഷാ മുഖ്യമന്ത്രി സുവേന്ദു അധികാരിയുമായി ഫോണിൽ സംസാരിച്ച് സ്ഥിതിഗതികൾ വിലയിരുത്തി. പരിക്കേറ്റ എല്ലാവർക്കും ആവശ്യമായ മികച്ച ചികിത്സാ സൗകര്യങ്ങൾ ഉറപ്പാക്കിയിട്ടുണ്ടെന്ന് അദ്ദേഹം വ്യക്തമാക്കി.
ദുരന്തത്തിന്റെ പശ്ചാത്തലത്തിൽ ഞായറാഴ്ച പശ്ചിമബംഗാളിൽ നിശ്ചയിച്ചിരുന്ന പൊതുപരിപാടികൾ റദ്ദാക്കിയ അമിത് ഷാ, ആശുപത്രിയിലെത്തി പരിക്കേറ്റവരെ സന്ദർശിക്കും.അപകടത്തിൽ പരിക്കേറ്റ നിരവധി പേരുടെ നില ഇപ്പോഴും അതീവ ഗുരുതരമായി തുടരുകയാണ്.
വിവരമറിഞ്ഞയുടൻ സ്ഥലത്തെത്തിയ ദുരന്തനിവാരണ സേനയും പൊലീസും ചേർന്നാണ് രക്ഷാപ്രവർത്തനം ഏകോപിപ്പിച്ചത്. പ്രദേശം ഇപ്പോൾ പൂർണ്ണമായും പൊലീസിന്റെ നിയന്ത്രണത്തിലാണ്.
