ന്യൂഡൽഹി: 2026 ഏഷ്യൻ ഗെയിംസിൽ മെഡൽ നേടിയ ഇന്ത്യൻ കായികതാരങ്ങളെ പ്രധാനമന്ത്രി നരേന്ദ്ര മോദി ആദരിക്കും. ഒക്ടോബർ 15ന് വൈകിട്ട് 4.30ന് ന്യൂഡൽഹിയിലെ ഔദ്യോഗിക വസതിയിലാണ് ചടങ്ങ്.
വിവിധ കായിക ഇനങ്ങളിൽ രാജ്യത്തിനായി മെഡലുകൾ നേടിയ താരങ്ങൾ ചടങ്ങിൽ പങ്കെടുക്കും. അന്താരാഷ്ട്ര കായിക വേദിയിൽ ഇന്ത്യ കൈവരിച്ച നേട്ടങ്ങൾ ആഘോഷിക്കാനും താരങ്ങളുടെ പ്രകടനങ്ങളെ അംഗീകരിക്കാനുമാണ് കൂടിക്കാഴ്ച സംഘടിപ്പിക്കുന്നത്.
ജപ്പാനിലെ ഐച്ചി–നഗോയയിൽ സെപ്റ്റംബർ 19 മുതൽ ഒക്ടോബർ 4 വരെ നടന്ന 2026 ഏഷ്യൻ ഗെയിംസിൽ ഇന്ത്യ 21 സ്വർണം, 27 വെള്ളി, 37 വെങ്കലം ഉൾപ്പെടെ ആകെ 85 മെഡലുകളാണ് നേടിയത്. മെഡൽ പട്ടികയിൽ നാലാം സ്ഥാനത്താണ് ഇന്ത്യ ഫിനിഷ് ചെയ്തത്. അമ്പെയ്ത്തിൽ അഞ്ച് സ്വർണം ഉൾപ്പെടെ ഒൻപത് മെഡലുകൾ ഇന്ത്യ സ്വന്തമാക്കി.
ഗുസ്തിയിൽ രണ്ട് സ്വർണം ഉൾപ്പെടെ ആറ് മെഡലുകളും ബോക്സിങ്ങിൽ മൂന്ന് സ്വർണം ഉൾപ്പെടെ ആറ് മെഡലുകളും നേടി.ഷൂട്ടിങ്ങിൽ മൂന്ന് സ്വർണം ഉൾപ്പെടെ 15 മെഡലുകളാണ് ഇന്ത്യയുടെ നേട്ടം. അത്ലറ്റിക്സിലാണ് ഇന്ത്യ ഏറ്റവും കൂടുതൽ മെഡലുകൾ നേടിയത്. ഒരു സ്വർണം, ഒൻപത് വെള്ളി, 14 വെങ്കലം എന്നിവയുൾപ്പെടെ 24 മെഡലുകളാണ് ഈ ഇനത്തിൽ ഇന്ത്യ സ്വന്തമാക്കിയത്.
ക്രിക്കറ്റിൽ പുരുഷ-വനിതാ ടീമുകൾ സ്വർണം നേടിയപ്പോൾ ഹോക്കിയിലും ഇന്ത്യക്ക് മികച്ച നേട്ടമുണ്ടായി. ഏഷ്യൻ ഗെയിംസിലെ താരങ്ങളുടെ പ്രകടനങ്ങളെ അഭിനന്ദിക്കാനും രാജ്യത്തിന്റെ കായിക നേട്ടങ്ങൾ പ്രോത്സാഹിപ്പിക്കാനുമുള്ള വേദിയായിരിക്കും പ്രധാനമന്ത്രിയുമായുള്ള കൂടിക്കാഴ്ച.
