കൊല്ലം : കിണറ്റിൽ വീണ യുവാവിനെ രക്ഷിക്കുന്നതിനിടെ കയർപൊട്ടിയുണ്ടായ അപകടത്തിൽ രണ്ടു യുവാക്കൾക്ക് ദാരുണാന്ത്യം.
കിണറ്റിൽ വീണയാളും രക്ഷിക്കാൻ ഇറങ്ങിയ യുവാവുമാണ് മരിച്ചത്.
കൊല്ലം കല്ലുവാതുക്കലിൽ ഇന്നു വൈകിട്ടാണ് സംഭവം.
കല്ലുവാതുക്കൽ സ്വദേശി വിഷ്ണു (23), മയ്യനാട് ധവളക്കുഴി സ്വദേശി ഹരിലാൽ (24) എന്നിവരാണു മരിച്ചത്.
വിഷ്ണുവാണ് കിണറ്റിൽ വീണത്. വിഷ്ണുവിനെ രക്ഷിക്കാനാണ് ഹരിലാൽ കിണറ്റിലിറങ്ങിയത്.
വെള്ളത്തിൽ നിന്നു പുറത്തെടുത്ത വിഷ്ണുവുമായി ഹരിലാൽ കിണറിനു മുകളിലേക്കു വരുന്നതിനിടെ കയർ പൊട്ടി ഇരുവരും താഴേക്കു വീഴുകയായിരുന്നു.
വിഷ്ണു കിണറ്റിൽ വീണപ്പോൾ വീട്ടുകാരുടെ നിലവിളി കേട്ട് ഓടിയെത്തിയതായിരുന്നു സമീപത്തെ സ്വകാര്യ ഫാക്ടറിയിലെ ജീവനക്കാരനായ ഹരിലാൽ വിഷ്ണുവുമായി കിണറിന്റെ മധ്യഭാഗത്ത് എത്തിയപ്പോഴാണു കയർ പൊട്ടിയതെന്നു ദൃക്സാക്ഷികൾ പറഞ്ഞു.
മൃതദേഹങ്ങൾ പാരിപ്പള്ളി മെഡിക്കൽ കോളജിലേക്ക് മാറ്റി.
കിണറ്റിൽ വീണയാളെ രക്ഷിക്കുന്നതിനിടെ കയർപൊട്ടി; കൊല്ലത്ത് രണ്ടു യുവാക്കൾക്ക് ദാരുണാന്ത്യം
