ആസാം നിയമസഭ ബഹുഭാര്യത്വ വിരുദ്ധ ബിൽ പാസാക്കി

ഗുവാഹത്തി: സംസ്ഥാനത്ത് ബഹുഭാര്യത്വം നിരോധിച്ചുകൊണ്ട് ആസാം നിയമസഭ ‘ആസാം പ്രൊഹിബിഷൻ ഓഫ് പോളിഗമി ബിൽ, 2025’ പാസാക്കി.

ഒരു പുതിയ ചരിത്രനിമിഷമെന്നാണ് മുഖ്യമന്ത്രി ഹിമന്ത ബിശ്വ ശർമ്മ ഈ നിയമനിർമ്മാണത്തെ വിശേഷിപ്പിച്ചത്. സ്ത്രീകളുടെ അവകാശങ്ങൾ സംരക്ഷിക്കുക, ലിംഗസമത്വം ഉറപ്പാക്കുക എന്നിവയാണ് ഈ നിയമത്തിൻ്റെ പ്രധാന ലക്ഷ്യങ്ങൾ.

പുതിയ നിയമം അനുസരിച്ച്, ഒരു ബഹുഭാര്യത്വം ശിക്ഷാർഹമായ കുറ്റമായി കണക്കാക്കപ്പെടും. ആദ്യമായി കുറ്റകൃത്യം ചെയ്യുന്നവർക്ക് ഏഴ് വർഷം വരെ തടവും പിഴയും ലഭിക്കാം. എന്നാൽ, നിലവിലുള്ള വിവാഹത്തെക്കുറിച്ചുള്ള വിവരം മറച്ചുവെച്ചുകൊണ്ട് രണ്ടാമതൊരു വിവാഹം കഴിച്ചാൽ, ശിക്ഷ പത്ത് വർഷം വരെ തടവായി വർദ്ധിക്കും. ഈ നിയമം ആവർത്തിച്ച് ലംഘിക്കുന്നവർക്ക് ഇരട്ടി ശിക്ഷ ലഭിക്കാനും സാധ്യതയുണ്ട്.

നേരിട്ടുള്ള കുറ്റവാളികളെ കൂടാതെ, ഈ വിവാഹങ്ങൾ പ്രോത്സാഹിപ്പിക്കുകയോ, അറിഞ്ഞുകൊണ്ട് നടത്തുകയോ, വിവരങ്ങൾ മറച്ചുവെക്കുകയോ ചെയ്യുന്നവർക്കും നിയമം അനുസരിച്ച് ശിക്ഷ ലഭിക്കും. ഗ്രാമത്തലവൻമാർ, കാസിമാർ, പുരോഹിതന്മാർ, മാതാപിതാക്കൾ, നിയമപരമായ രക്ഷാകർത്താക്കൾ എന്നിവർക്ക് രണ്ട് വർഷം വരെ തടവും പിഴയും ശിക്ഷയായി ലഭിക്കാം. ബില്ലിലെ വ്യവസ്ഥകൾ ലംഘിച്ച് വിവാഹങ്ങൾ നടത്തിക്കൊടുക്കുന്ന മതപണ്ഡിതർക്ക് 1.5 ലക്ഷം രൂപ വരെ പിഴ ചുമത്താനും സാധ്യതയുണ്ട്.

ഈ നിയമത്തിൻ്റെ പരിധിയിൽ നിന്ന് ഭരണഘടനയുടെ ആറാം ഷെഡ്യൂളിൽ ഉൾപ്പെടുന്ന പ്രദേശങ്ങളെയും പട്ടികവർഗ്ഗ  വിഭാഗക്കാരെയും ഒഴിവാക്കിയിട്ടുണ്ട്.

അനധികൃത ബഹുഭാര്യത്വത്തിന് ഇരയാകുന്ന സ്ത്രീകൾക്ക് നിയമപരമായ സംരക്ഷണവും സാമ്പത്തിക നഷ്ടപരിഹാരവും നൽകാൻ ഈ നിയമം വ്യവസ്ഥ ചെയ്യുന്നുണ്ട്. ഇതിനായി ഒരു പ്രത്യേക അതോറിറ്റിയെ നിയമിക്കുകയും നഷ്ടപരിഹാരം നൽകാനുള്ള നടപടികൾ കൈക്കൊള്ളുകയും ചെയ്യും.

ബഹുഭാര്യത്വം കുറ്റകൃത്യമായി തെളിയിക്കപ്പെടുന്ന വ്യക്തികളെ സംസ്ഥാന സർക്കാരിൻ്റെ ധനസഹായമുള്ളതോ പിന്തുണയുള്ളതോ ആയ പൊതുതൊഴിലുകളിൽ നിന്നും പദ്ധതികളിൽ നിന്നുമുള്ള ആനുകൂല്യങ്ങൾക്കും തെരഞ്ഞെടുപ്പുകളിൽ മത്സരിക്കുന്നതിനും വിലക്കും.

ഈ നിയമം ഏകീകൃത സിവിൽ കോഡിൻ്റെ ദിശയിലേക്കുള്ള ഒരു ചുവടുവയ്പ്പാണെന്ന് മുഖ്യമന്ത്രി ഹിമന്ത ബിശ്വ ശർമ്മ അഭിപ്രായപ്പെട്ടു. അടുത്ത തിരഞ്ഞെടുപ്പിൽ അധികാരത്തിൽ തിരിച്ചെത്തിയാൽ ഇതു സംബന്ധിച്ച ബിൽ നിയമസഭയുടെ ആദ്യ സെഷനിൽ കൊണ്ടുവരുമെന്നും അദ്ദേഹം പ്രഖ്യാപിച്ചു.

പ്രതിപക്ഷ പാർട്ടികളിൽ ചിലർ ബില്ലിനെ എതിർക്കുകയും വ്യക്തിനിയമങ്ങളുടെ ലംഘനമാണ് ഈ നിയമമെന്ന് ആരോപിക്കുകയും ചെയ്തു. എന്നാൽ, ഈ നിയമം ഒരു പ്രത്യേക മതവിഭാഗത്തിന് എതിരല്ലെന്നും എല്ലാ വിഭാഗം ജനങ്ങൾക്കും ബാധകമാണെന്നും, ബഹുഭാര്യത്വം ഇസ്‌ലാമിക നിയമപ്രകാരം ഒരു അപവാദം മാത്രമാണെന്നും മുഖ്യമന്ത്രി വിശദീകരിച്ചു.

നിയമസഭ പാസാക്കിയ ഈ ബില്ലിന് നിയമമായി മാറുന്നതിന് മുമ്പ് രാഷ്ട്രപതിയുടെ അംഗീകാരം ആവശ്യമുണ്ട്. സംസ്ഥാന നിയമം കേന്ദ്ര നിയമത്തിന് വിരുദ്ധമായി വരുമ്പോൾ രാഷ്ട്രപതിയുടെ അനുമതി അനിവാര്യമായതിനാലാണിത്.

ഹിന്ദു വിവാഹ നിയമം നിലവിൽ ഉള്ളതുകൊണ്ട് ഹിന്ദു, ബുദ്ധ, ജൈന, സിഖ് മതക്കാർക്ക് ബഹുഭാര്യത്വം നിരോധിച്ചിട്ടുള്ളതും കുറ്റകരവുമാണ്. നിലവിൽ, മുസ്‌ലിം വ്യക്തിനിയമം അനുസരിച്ച് പുരുഷന്മാർക്ക് ചില വ്യവസ്ഥകളോടെ നാല് വിവാഹം വരെ കഴിക്കാൻ അനുവാദമുണ്ട്.

ഭരണഘടനയുടെ ആറാം ഷെഡ്യൂളിൽ ഉൾപ്പെടുന്ന ഗോത്രവർഗ്ഗ വിഭാഗങ്ങളെ ഈ പുതിയ നിയമത്തിൽ നിന്ന് ഒഴിവാക്കിയിട്ടുണ്ട്. ഇതിൻ്റെ പശ്ചാത്തലത്തിൽ, നിലവിൽ ബഹുഭാര്യത്വം അനുവദനീയമായിട്ടുള്ള മുസ്‌ലിം സമുദായത്തെയായിരിക്കും ഈ പുതിയ നിയമം പ്രധാനമായും ബാധിക്കുക.

2011-ലെ സെൻസസ് പ്രകാരം അസം സംസ്ഥാനത്തെ ആകെ മുസ്‌ലിം ജനസംഖ്യ ഏകദേശം 1.07 കോടിയാണ്. സംസ്ഥാനത്തെ മൊത്തം ജനസംഖ്യയിലെ ശതമാനം 34.22 ശതമാനം വരും ഇത്.

സംസ്ഥാനത്തെ രണ്ടാമത്തെ വലിയ മതവിഭാഗമാണ് മുസ്‌ലിംകൾ. 2011-ലെ കണക്കനുസരിച്ച് സംസ്ഥാനത്തെ ഒമ്പതോളം ജില്ലകളിൽ മുസ്‌ലിംകൾ ഭൂരിപക്ഷമാണ്. 2011-നു ശേഷമുള്ള ഔദ്യോഗിക സെൻസസ് വിവരങ്ങൾ ലഭ്യമല്ലെങ്കിലും, 2021-ലെ കണക്കുകൾ പ്രകാരം മുസ്‌ലിം ജനസംഖ്യ 40% വരെ എത്തിയിട്ടുണ്ടെന്ന് മുഖ്യമന്ത്രി ഹിമന്ത ബിശ്വ ശർമ്മ ഉൾപ്പെടെയുള്ളവർ പറയുന്നത്.